Herson vilâyetiniñ uquq qoruyıcıları eki meskün yerde elektrik tiremeleriniñ bozuluvı aqqında malümatnı teşkere.
«Saat 8.35 Geniçesk politsiya bölügine Ataman köyü yanındaki tarlada elektrik berici yolağınıñ demir-beton tiremesiniñ bozuluvı aqqında haber keldi. Aynı şu zamanda Çaplinkadaki politsiya bölügine bu kibi haber keldi. Ukrainka köyü yanında elektrik berici yolağınıñ demir-beton tiremesi bozulğan», – denile Herson vilâyeti Milliy politsiya Baş idaresiniñ beyanatında.
Malüm olğanı kibi, vaqia yerine taqiqat gruppası ve patlav tehnikiy hızmetniñ hadimleri çıqtı. Ukraina Cinaiy kodeksiniñ 194 maddesi boyunca cinaiy işlerniñ açılması aqqında mesele baqıla.
Herson vilâyetinde elektrik tiremeleri bundan da evel bozulğan edi.
Herson vilâyetinde oktâbr 20 künü kene bir kene «Melitopol-Canköy» yolağınıñ tiremelerini bozdılar. Biriniñ tübüne mina qoyulğan edi. Militsiyanıñ bildirgenine köre, 3 mina ve 2 trotil qılıçı tapıldı. «Elektroenergetika obyektlerniñ aselet bozulması» maddesi boyunca cinaiy ketişat başlanıldı.
Oktâbr 6-na keçer gecesi belgisiz şahıslar Canköy-Melitopol yolağınıñ eletktrotiremesini bozdılar.
