Link açıqlığı

Moskvada Yuqarı mahkeme Qırımtatar Milliy Meclisi reisiniñ keñeşçisine Rusiyege kiriş yasağını tasdiqladı


Rusiye Yuqarı mahkemesi Moskva şeer mahkemesiniñ İsmet Yüksel – Qırımtatar Milliy Meclisi reisiniñ keñeşçisiniñ Rusiye Federatsiyasına kirişi yasaq etilgeni aqqında qararını tasdiqladı.

«Noyabr 18 künü Rusiye Federatsiyasınıñ Yuqarı Mahkemesinde Qırımtatar Milliy Meclisi reisiniñ keñeşçisi İsmet Yükselniñ onıñ Rusiyege kirişi 5 yılğa yasaq etilmesi aqqında qararnı çıqarğan Moskva şeer mahkemesine şikâyet arizası baqıldı. Evel mahkemelerde olğanı kibi, Rusiyede İsmet Yükselniñ temsilcisi, advokat-uquq qoruyıcı İllarion Vasilyevge Qırımğa kiriş yasağınıñ sebeplerini añlatmadılar», – haber ete Meclisniñ matbuat hızmeti.

İsmet Yüksel Qırımda ailesi ile 20 yıl yaşay edi. 2014 senesi avgust 19 künü Qırım yarımadasına Ermeni Bazar kiriş noqtasından kirgende, Yükselge Rusiye FSB organları oña kirişni 5 yılğa yasaq etkeni aqqında haberni seslendirdiler, 2019 senesi iyün 30-na qadar.

İsmet Yükselniñ Rusiyege qarşı şikâyetini İnsan aqları boyunca Avropa mahkemesi qabul etti.

Aynı böyle yasaqlar qırımtatarlarnıñ lideri Mustafa Cemilev ve Qırımtatar Milliy Meclisi reisi Refat Çubarovğa berildi.

XS
SM
MD
LG