Ukraina prezidenti Petro Poroşenko Romada İtaliya deputatları palatasınıñ reisi Laura Boldrini ile korüşip, Rusiye nezareti altında olğan Qırımda insan aqları ile bağlı vaziyetni muzakere etti.
Bu aqta Ukraina prezidenti memuriyetiniñ matbuat hızmetiniñ beyanatında aytıla.
«Taraflar bunıñ ile Qırımda insan aqları ile bağlı vaziyetniñ bozuluvını ve halqara uquq qoruyıcı institutları temsilcileriniñ vaqtınca işğal etilgen yarımada toprağına irişim imkâniyetini muzakere ettiler», – denile beyanatta.
Malümatqa köre, İtaliya parlamenti de Rusiye Federatsiyasına nisbeten sanktsiyalarnıñ uzattırılmasına qol tuta.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
