Link açıqlığı

İnternet-soravdan keçken insanlarnıñ üçte bir qısmı Qırım «energetik qamaçavına» qol tuttı


Ukrain internet-qullanıcılarınıñ fikrini ögrenüv neticelerine köre, Qırımnıñ «energetik» qamaçavına soralğan insanlarnıñ 32% qol tuta. Buña qatiyen qarşı 22% çıqa.

Bunı oktâbr 17-22 künleri TNS On-line Track tarafından keçirilgen tedqiq köstere.

16% – Qırımnıñ «energetik qamaçavına» «qol tutqanını belley», 5% – bu mevzu ile meraqlanmay, 16% – «qol tutmağanını belley» ve 9% – cevap berip olamadı.​

​Şimaliy region sakinleri arasında Qırım ile sıñır qamaçavına qol tutqanlarnıñ ve yarımadanıñ energetik qamaçavını kerekli dep tanığanlarnıñ sayısı az, Ğarbiy ve Merkeziy regionlarda bunı desteklegen insanlarnıñ sayısı çoqçadır. Erkekler, qadınlarğa köre, Qırım ile sıñırnıñ qamaçavına sıqça qol tuta», – denile beyanatta.

Qırım.Aqiqatqa Ukrainada TNS şirketiniñ temsilcisi Aleksandra Persikovaya bildirgeni kibi, sorav Ukrainanıñ farqlı regionlarınıñ sakinleri arasında keçirildi, Qırım ve Ukraina akimiyetine tabi olmağan territoriyalardan ğayrı.

Qırım.Aqiqat oktâbr aynıda Hreşçatikte keçirgen soravına köre, ukrainler yarımadağa elektrik energiyası ve malnıñ ketirüv qamaçavına farqlı davranalar. Çoqusı bu ğayege qol tutmayıp, yarımadada ukrain vatandaşlarınıñ yaşağanını qayd etti.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG