Sudaq yanındaki «Yañı Maale» camisinden para ianelerini hırsızladılar, haber ete Qırım Musulmanları diniy idaresi.
«Bu sene Qırımda endi sekizinci sefer musulmanlarnıñ ibadet evlerini abraylar. Bu sefer cinayetçiler paranı iane qutusı ile çıqardılar», – denile Müftiylikniñ beyanatında.
Cami imamı Mustafa Mustafayevniñ malümatına köre, iane demir qutusınıñ olmağanını noyabr 17-de ögrendiler. İçinde üç afta devamında iane etilgen para saqlı edi.
Noyabr 14-ne keçer gecesi belgisiz şahıslar Canköy rayonı Küçük Alqalı köyüniñ camisine taş atqan ediler. Qırım Müftiyliginde bildirilgeni kibi, politsiya vaqia yerinde bir çuval taş toplağan edi.
2015 senesi başında Qırımnıñ bir çoq camisinde hırsızlıq yüz berdi, amma cinayetçilerniñ tapılğanı aqqında bir şey belli degil.
