Ukrain uquq qoruyıcıları degeni kibi, Qırım memuriy sıñırında qamaçavnı faallerniñ küçünen degil de, Qırım Rusiye akimiyetiniñ yaşayışına keder etecek devlet qanunları vastası ile keçirmek kerek.
Bunı Qırım.Aqiqat.Radiosınıñ efirinde İnsan aqları boyunca Ukrain Helsing birliginiñ adliye merkeziniñ reberi Boris Zaharov bildirdi.
«Qamaçavğa qatiyen qarşı degilmiz. Qamaçav işğalciniñ infrastukturasına inkişaf etmek imkâniyetini bermemek, insan aqlarını qorumaq kerektir», – dedi o.
Adliyeciniñ aytqanı kibi, şimdi Qırımnıñ memuriy sıñırında Qırım qamaçavınıñ iştirakçileri tarafından insan aqları ep bozulmaqta. Şu cümleden, qırımlılarnı tintemege ve mallarını tutıp almağa devam etkenlerine diqqat ayırdı. Uquq qoruyıcılar deyler ki, böyle areketler Ukraina tarafdarı olğan qırımlılarnı qorquza.
«Ukraina, eñ azından, vatandaşlarnıñ normal yaşayışını ve aqlarınıñ qorçalavını temin etmeli», – dedi İnsan aqları boyunca Ukrain Helsing Birliginiñ yuristi Darya Sviridova.
«Vatandaşlarnı sucuq ile degil de, azatlıq ile meraqlandırmaq kerek. Azatlıq olsa, sucuq da olur», – dep qoştı Zaharov.
Uquq qoruyıcılar yarımada qamaçavı işitarkçilerini defalarca tenqit etken ediler.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
