Aqmescitniñ Kiyev rayon mahkemesi «QARA DEÑİZ PRODUCTION» studiyasınıñ baş müdir muavini, ATR qırımtatar telekanalınıñ sabıq baş müdir muavini Lilâ Bucurovanıñ onıñ evinde noyabr 2 künü tintüvni keçirgen RF FSB hadimlerine qarşı davasını qabul etmedi, dep bildire 15 minut saytı.
Neşirniñ yazğanı kibi,mahkemeci iş malümatında taqiqatçı advokat Cemil Temişevge tintüv vaqtında evde bulunmasını şahsen red etkenini tasdiqlağan yeterli delil yoq olğanını tüşündi.
«Mahkemeci kelgenimni, tintüv vaqtında bulunmamda israr etkenimni, tintüvden soñ taqiqatçı ile subetleşkenimni ve meni içeri kirsetmegeninden çorlağanımnı körgen şaatlarnen subetleşmege istemedi», – dey Cemil Temişev.
Sözlerine binayen, taqiqatçı öz areketlerini «advokatnıñ tintüvde bulunmasını maqsatqa uymağan» tanığanı ile añlattı.
Bucurova mahkeme qararını beklenilgen dep adlandırdı ve oña itiraz bildirecek ola.
«Mahkemeniñ işbu qararına itiraz bildirecekmiz. Onı qanunsız sayam, evimde keçirilgen tintüv kibi qanunsızdır. Saña aqlarıñ, qanunlar, ya da adalet bağışlanğanda, bu kibi şartlarğa boyun egmeycem. Aqlarım maña bağışlanmay. Olar qanun tarafından qorçalanmalı. Şimdi qanun meni qorçalamadı, teessüf ki», – dey Bucurova.
Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.
Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.
