Link açıqlığı

Qırımtatar Milliy Meclisi reisiniñ birinci muavini Nariman Celâl Qırım.Aqiqatqa «fevral 26 işi» iştirakçilerine nisbeten mahkeme qararlarını izaatlap, çoqusı bu işniñ aselet uzattırılmasını qayd etkenini bildire.

«Taqiqat işniñ pek şübeli olğanını añlay. İşniñ esasını baqmağa, ğaliba, saqınalar. Şaatlar yoq, olsa bile, ölzlerini öyle tanıttılar ki, pek qıyın. Misal içün, Ahtem Çiygoznı onıñ kütleviy tertipsizliklerniñ ne teşkilâtçısı, ne iştirakçisi olğanını, o künü teşkil etilgen siyasiy mitingniñ iştirakçisi olğanını tasdiqlağan bir çoq şaat bar», – dep qayd etti Celâl.

«Eger de fevral 26 işi kerek olğanı kibi taqiq etilse, bugün yüksek vazifelerde bulunğan bir çoq insan oña celp etilmeli», – dey o.

Olarnıñ arasında, Meclisniñ bir qaç sabıq azası ve Qırımnıñ bazı yolbaşçıları.

Qırım akimiyeti bu iş boyunca mahkeme toplaşuvlarını izaatlamay.

Aqmescitniñ Kiyev rayon mahkemesi noyabr 17 künü fevral 26 vaqiaları boyunca yaqalanğan ve apiste bulunğan eki qırımtatar faali Ali Asanov ve Mustafa Degermenciniñ tevqif müddetlerini 2016 senesi fevral 19-na qadar uzattırdı, olar şimdi Aqmescitniñ SİZOsında bulunalar. Qırımtatar Milliy Meclisi reisiniñ muavini Ahtem Çiygoznıñ ceza qararı boyunca mahkeme toplaşuvı keçti, neticede apis müddetini 2016 senesi yanvar 29-na qadar uzattılar.

XS
SM
MD
LG