Link açıqlığı

Ukraina Tış işler nazirligi qırımtatar siyasiy mabüslerge bağışlanğan kampaniyanı azırlay


Ukraina Tış işler nazirliginiñ mahsus avaleler boyunca elçisi Dmitriy Kuleba temsilcileri Qırımtatar Milliy Meclisi ile birlikte qırımtatar siyasiy mabüslerge bağışlanğan ayrı haber kampaniyasını keçirmege planlaştırğanı aqqında bildire.

Bunı o Qırım.Aqiqatqa bildirdi.

«Meclisnen birlikte Qırımda mabüs olaraq tutulğan insanlarnıñ cedvelini tizecek olamız ve, oña köre, şu şahıslarnıñ taqdiri ve meselelerine cümle diqqatını celp etmek içün aktsiya ve adımlarımıznı işlep çıqaracaqmız», – dep qayd etti Kuleba.

Şimdi Qırımda Rusiye taqiqatçıları tarafından açılğan işler boyunca yaqalanğan qırımtatar faalleri süretleriniñ Ukraina Tış işler nazirligi binasında açılğan siyasiy mabüsler gallereyasında olmağanını añlattı.

«Qırımtatar halqı temsilcileriniñ aqlarını qorumağa ve olarnı azat etmege areket etemiz, amma olarnıñ süretlerini diger siyasiy mabüsler ile bir sırada assa edik, Qırımnı ukrain territoriyası olaraq tanımağanımıznı bildirer edik. Bu ise qatiyen öyle degil», – dep qoştı elçi.

Siyasiy mabüsler gallereyası Ukraina Tış işler nazirliginiñ altıncı qatında peyda oldı. Bu sergini Ukrain Tış işler nazirligi «Yevromaydan-SOS» teşebbüsi ile birlikte azırladı.

XS
SM
MD
LG