Link açıqlığı

Ukraina Haber siyaseti nazirligi Ukraina Tış işler nazirligine qırımtatar halqınıñ sürgünligini halqara seviyede tanıtmaq ketişatını başlamağa rica ete.

Bunı Kiyevde matbuat konferentsiyası devamında Ukraina haber siyaseti naziriniñ Qırım meselelerinden keñeşçisi Emine Ceppar noyabr 17 künü bildirdi.

Nazirligimiz adından Tış işler nazirligine muracaat etip, sürgünlik mevzusını halqara meydançıqlarda kötermege ricada bulunamız, açlıq meselesi ile etkeni kibi. Anda insan, tecribe ve bilgi bar», – qayd etti Ceppar.

İşbu teşebbüsni Ukraina Yuqarı Radası seviyesinde Qırımtatar Milliy Meclisiniñ reisi Refat Çubarov da köterecek ola.

«Fikrime köre, Yuqarı Radanıñ bir qaç komiteti ve «Qırım» deputat birliginiñ areket planını meydanğa ketirermiz. Mında çoq şey faalligimizge, diasporalarnıñ faalligine, halqara kontaktlarğa baqlı, em devlet seviyesinde, em de halq diplomatiyası seviyesinde. Özümizge böyle mecburiyet alamız, qırımtatar halqı sürgünliginiñ yıllığına, belki de, faciamıznı yaqın alğan devletler bu meseleni baqarlar», – dey Çubarov.

«Biz, ukrainler, halqara toplulıqqa açlıq aqqında aytsaq ve onı tanımağa talap etsek, ukrainler ile birlikte umumiy tarihımıznıñ zor vaqialarını yaşağan halqlarnıñ faciasını körmemezlikke uramamız», – dep qayd etti 1944 senesi qırımtatarlarnıñ sürgünligini genotsid olaraq tanılması aqqında qararnıñ müellifi Nikolay Knâjitskiy.

Ukraina Tış işler nazirliginiñ cevabı daa yoq.

Noyabr 12 künü Yuqarı Rada 1944 senesi qırımtatar halqınıñ sürgünligini genotsid olaraq tanılması aqqında qararnı qabul etti.

Qırımtatar halqı 1944 senesi mayıs 18 künü yarımadadan mecburen sürgün etildi. Sovet akimiyeti bunı «qırımtatarlarnıñ Ekinci cian cenki vaqtında natsist Almaniya ile işbirlikte buluması» ile añlattı. 1989 senesi SSCB Yuqarı Şurası sürgünlikni qanunsız ve cinaiy tanıdı.

XS
SM
MD
LG