Qırımda politsiya «Rus sidâşçaya» Rusiye birliginiñ azası, faali Aleksandr Denisovnı yaqaldı ve «subetten» soñ azat etti. Qırım.Aqiqat mühbiri bildirgeni kibi, Denisovnı Aqmescit Kiyev rayon mahkemesiniñ binası yanında yaqaladılar, mında o Qırımtatar Milliy Meclisi reisiniñ muavini Ahtem Çiygoznıñ mahkeme toplaşuvında bulunğan edi.
Aleksandr Denisov mahkeme toplaşuvına «Rus sidâşçaya» («Oturğan Rus») yazısı ile futbolkanı kiyip kelgen edi. Mahkeme toplaşuvı soñuna yetkende, Denisov: «Ukrainağa şan-şerefler!» qıçırıp, salonnı terk etti.
Birazdan onı politsiya hadimleri yaqaladı ve Dekabristov, 19 soqağında yerleşken «E» merkezine ketirdiler, dep bildire Qırım.Aqiqat mühbiri.
Qırım boyunca Rusiye Taqiqat komitetiniñ baş taqiqat idaresiniñ saytında bu aqta malümat şimdilik yoq.
Aqmescitniñ Kiyev rayon mahkemesi noyabr 17 künü fevral 26 vaqiaları boyunca yaqalanğan ve apiste bulunğan eki qırımtatar faali Ali Asanov ve Mustafa Degermenciniñ tevqif müddetlerini 2016 senesi fevral 19-na qadar uzattırdı, olar şimdi Aqmescitniñ SİZOsında bulunalar. Qırımtatar Milliy Meclisi reisiniñ muavini Ahtem Çiygoznıñ ceza qararı boyunca mahkeme toplaşuvı keçti, neticede apis müddetini 2016 senesi yanvar 29-na qadar uzattılar.
