Qırımnıñ rusiyeliler ile toldurılması qanunsızdır, yañı köçip kelgenler yarımadanıñ işğalden azat etilmesinden soñ Qırımnı terk etmege mecbur olacaqlar, dedi halq deputatı, Qırımtatar Milliy Meclisiniñ reisi Refat Çubarov.
«Qavmiy, diniy mensüplikke baqmadan, Qırımda işğalinden soñ yerleşken er bir insan Qırımda qanunsız yerleşti. Qırımnıñ işğаlden azat etilmesinden soñ yarımadanı terk etmege mecbur olacaqlarını bilmek kerekler. Qırımda şimdi yerleşken biñlerce insan qanunsız sürette yerleşe», – dedi Çubarov Kiyevde matbuat konferentsiyasında, haber ete Qırım.Aqiqat mühbiri.
Evel Çubarov aytqanı kibi, şimdi «işğal etilgen Qırımnı suniy sürette rusiyelilerge tolduralar».
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
