Qırımtatar medeniyetiniñ inkişafına Ukraina bücetinden para ayırılmalı, dep tüşüne Yuqarı Rada medeniyet ve maneviylik meselelerinden komitetiniñ reisi Nikolay Knâjitskiy.
Bu aqta o Kiyevde noyabr 17-de matbuat konferentsiyasında bildirdi, haber ete Qırım.Aqiqat mühbiri.
«Şimdi medeniyet nazirligi, biz bücetni qabul etecekmiz, para ayırılmalı ve bu qırımtatar halq medeniyetiniñ inkişafı içün lâyıq vasta olmalı. Halq inkişafınıñ diger yönelişlerine de ait», – dey Knâjitskiy.
O bu meseleni Yuqarı Radada kötermege söz berdi.
«Dünya bizim qırımtatar halqınıñ zengin ve aenkli medeniyetiniñ inkişafı içün çoq şey yapqanımıznı körmeli, işğal etilgen topraqta yaşağan insanlar qol tutqanımıznı is etmeli», – dep qoştı deputat.
Noyabr 12 künü Yuqarı Rada 1944 senesi qırımtatar halqınıñ sürgünligini genotsid olaraq tanılması aqqında qararnı qabul etti. Qarar leyhasınıñ müellifi – Nikolay Knâjitskiy.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
