Aqmescit Kiyev rayon mahkemesiniñ «fevral 26 işi» boyunca toplaşuvında mahkemeci qabaatlanğan Ali Asanov, Mustafa Degermeci, Ahtem Çiygozğa qol tutmağa kelgen soy-soplarını salondan çıqardı.
Qırım.Aqiqat mühbiri bildirgeni kibi, Mustafa Degermeciniñ işi baqılğanda, salonda bir 50 insan buluna edi, şu cümleden «fevral 26» işi boyunca qabaatlanğanlarnıñ soyları, Qırım cemaatçıları ve qırımtatar areket veteranları.
Mahkemeci qabaatlanğan şahısqa söz bergende, Mustafa Degermeci mahkeme salonında bulunğan tuvğanlarını selâmlamağa istegenini bildirdi. Bunı eşitip, zalda bulunğanlarnıñ bir qısmı alğışlamağa ve Degermecige qol tutuv sözlerini aytmağa başladı.
Mahkemeci bunı mahkeme toplaşuvına keder etken areket olaraq tanıdı ve insanlarnı mahkeme salonını terk etmege mecbur etti. Böyleliknen, mahkeme qararı yalıñız qabaatlanğan şahıs, avdokatı ve mahkemeci ögünde seslendirildi.
Mustafa Degermeciniñ avdokatı Aleksandr Solodkov mahkemege apiste bulunuv müddetini uzattırmamaq ricası ile muracaat etip, Aqmescit SİZOsında «normal keçiniş şaraitleri yoq olğanını» qayd etti. Aytqanı kibi, SİZOda amam yoq, mabuslar ise nevbetnen yuqlamağa mecbur.
Aqmescitniñ Kiyev rayon mahkemesi noyabr 17 künü fevral 26 vaqiaları boyunca yaqalanğan ve apiste bulunğan eki qırımtatar faali Ali Asanov ve Mustafa Degermenciniñ tevqif müddetlerini 2016 senesi fevral 19-na qadar uzattırdı, olar şimdi Aqmescitniñ SİZOsında bulunalar.
