Aqmescitniñ Kiyev rayon mahkemesinde noyabr 17 künü Qırımtatar Milliy Meclisi reisiniñ muavini Ahtem Çiygoznıñ ceza qararı boyunca mahkeme toplaşuvı keçti, neticede apis müddetini 2016 senesi yanvar 29-na qadar uzattılar. Bunı Qırım.Aqiqat mühbiri bildire.
Mahkeme toplaşuvında advokatlar Çiygoznıñ keçindirüvinde 2002 senesi doğma balası ve esli başlı ana-babası olğanı aqqında bildirdiler. Bunıñ ile imayesi Ahtem Çiygoznıñ Bağçasarayda yaşağanını, müsbet ayat tarzı olğanını ve yaqalavından evel nice sefer çetelge çıqıp, daima qaytqanını, yani Qırımnı terk etmege ve taqiqattan saqlanmağa niyeti olmağanını qayd etti.
Advokatlarnıñ sözlerine köre, Çiygoznı apiste tutmağa sebep yoq, amma mahkemeniñ fikrine binayen, cezanı deñiştirmek içün delil azdır.
Ahtem Çiygoznıñ özü mahkeme esnasını mısqıl olaraq adladı.
«Qırımda vatandaşlarıma qarşı büyük terror keçirile. Adalet aqqında aytmağa acet yoq. İşim – mısqıldır, apiste bulunmamnıñ sebebi yoq, sımarlanğan siyasiy bir iştir», – dedi Meclisniñ liderlerinden biri.
Mahkemeci Viktor Mojelânskiy Qırım rusiyeli prokuraturasınıñ şefaatını qabul etip, Çiygoznı apiste qaldırmağa qarar aldı.
Qırım.Aqiqat bildirgeni kibi, mahkeme salonını terk etip, Ahtem Çiygoz toplaşuvda bulunğan tuvğanları, dostları, Meclis temsilcileri, qırımtatar areketiniñ veteranlarına teşekkür bildirdi ve mahkeme zalında bulunğan qırımtatar milliy areket veteranı Veciye Kaşkanıñ qolunı aldı.
Salonda bulunğanlardan biri «Ukrainağa şan-şüretler!» dep qıçırdı, Ahtem Çiygoznıñ cevabı: «Millet, Vatan, Meclis» oldı.
Çiygoznıñ advokatı Emil Kürbedinov degeni kibi, apis müddetiniñ uzattırılması aqqında mahkeme qararına itiraz bildirecektir.
Qırımtatar Milliy Meclisi reisiniñ muavini Ahtem Çiygoznı Qırım parlamenti yanında 2014 senesi fevral 26-da keçirilgen kütleviy tertipsizliklerni meydanğa ketirmesi boyunca qabaatlap, 2015 senesi yanvar 29-da yaqaladılar.
Aqmescitniñ Kiyev rayon mahkemesi noyabr 17 künü fevral 26 vaqiaları boyunca yaqalanğan ve apiste bulunğan eki qırımtatar faali Ali Asanov ve Mustafa Degermenciniñ tevqif müddetlerini 2016 senesi fevral 19-na qadar uzattırdı, olar şimdi Aqmescitniñ SİZOsında bulunalar.
