Link açıqlığı

Saatnıñ esas haberi

Smedlâyev: Qırım camisine ücüm – yarımadada vaziyetniñ kerginleşüvine nevbetteki adım


Noyabr 14-ne keçer gecesi Canköy rayonı Küçük Alqalı (Zavet-Leninskiy) köyünde yerleşken camige ücüm – Qırımda vaziyetniñ kerginleşüvine nevbetteki adım. Bunı Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev bildirdi.

«Tevqif ve qanunsız apis cezaları, qırımtatarlarnıñ hırsızlavı ve öldürüvi, camilerniñ ateşke berilmesi ve abravı, qırımtatar timsalleri ile maşinalarnıñ bozuluvı, qırımtatar timsallerini qullanmaq yasağı – regionda vaziyetniñ kerginleşüvine yönelgen areketlerdir», – yazdı o Facebookta.

Onıñ sözlerine köre, bütün bu areketler mahsus yapıla: «Akimiyet qırımlılarnıñ iqtisadiy oñaytlığını eyileştirip olamağanını gizlemek içün, mında milletlerara qarşılıqnı meydanğa ketirecek ola, bu ketişatqa bütün bunı alğışlağan ve antitatar ve antimusulman tariklerniñ tarafdarları olğan qırımtatar memurlarını celp etmege tırışa».

Qırımda belgisiz şahıslar Canköy rayonı Küçük Alqalı (Zavet-Leninskiy) köyünde yerleşken caminiñ eki penceresini qırdı. Vaqia noyabr 14-ne keçer gecesi yüz bergendir.

Bu sene sentâbr ayında Aqmescitte Cuma cami qurucılığı yerinde belgisiz şahıslar bina isarında asılğan bir qaç levhanı boya ile lekeledi ve yırtıp qoydılar.

XS
SM
MD
LG