ATR qırımtatar telekanalınıñ sabıq muarriri, şimdi – «Qaradeñiz production» şirketiniñ baş müdir muavini Lilâ Bucurova noyabr 2 künü evinde tintüv keçirgen Rusiye FSB hadimlerine qarşı mahkeme davasını açtı. Bu aqta Bucurovanıñ özü bildirdi, onıñ bildirüvi ile videonı bazarertesi künü, noyabr 16-da, «15 minut» saytı aşkâr etti.
Onıñ sözlerine köre, buña taqiqat tedbirleri keçirilgen yerde jurnalistniñ avdokatına bulunmağa izin berilmemesi sebep oldı. Böyleliknen onıñ avdokat imayesine olğan anayasa aqqı bozuldı, dey Qırım jurnalisti.
Bu iş boyunca birinci toplaşuv noyabr 16 künü Aqmescitniñ Kiyev rayon mahkemesinde keçti.
«Eviminiñ qapıları yanında avdokatnı soylarım, diger şaatlar kördi. Bundan da ğayrı, evimdeki işbu «tedbirniñ» videoyazısı bar, amma FSB ve sayğılı mahkemeci tintüvni keçirgen taqiqatçı şahsen avdokatqa yasaq etmegenini bildireler. Bu er şey mantıqqa uymay: şahsen yasaq etmesi mümkün degil edi, çünki advokat taqiqatçı bulunğan odağa kirsetilmedi», – dey Bucurova.
Advokat Cemil Temişev aytqanı kibi, tintüv keçirilgende, vatandaşlarğa advokatnıñ bulunmasını sıq sürette red eteler. Advokat işbu red etüvniñ qanuniyligini ögrenmege areket etecek ve «bu sualge cevap almaq içün Rusiye Federatsiyasınıñ Yuqarı mahkemesine muracaat etmege azır olğanını» bildire – devlet insanğa Rusiye Anayasasınıñ 48-nci maddesine köre yüridik yardım aqqını teminleymi.
Bu iş boyunca nevbetteki mahkeme toplaşuvı noyabr 18-ne planlaştırılğan.
Qırım.Aqiqat Lilâ Bucurovanıñ izaatını elde etmege tırışa.
Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler.
Birazdan Lilâ Bucurova evinde Rusiye FSB silâlı hadimleri tarafından keçirilgen tintüv aqqında tafsilâtlı sürette tarif etti.
Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.
