Qırım musulmanları diniy idaresi haber etkeni kibi, politsiya noyabr 14-ne keçer gecesi Canköy rayonı Küçük Alqalı (Zavet-Leninskiy) köyünde yerleşken camige belgisiz şahıslar tarаfından atılğan bir qaç tolanı cıydı.
Bu aqta Qırım Müftiyliginiñ matbuat hızmeti bildire.
«Taşlarnıñ bir qısmı divarlarğa, başqası – damğa, daa bir qısmı – pencerelerni qırıp, camige tüşti. Tolalar öyle bir küç ile atılğan edi ki, camlarnı qırıp, qarşıdaki divarğa uruldı ve namaz zalındaki örtülerni yırtıp qoydı. Camige atılğan aman-aman bütün taşlar politsiya tarafından cıyıldı. Bir çuval oldı – bir 40-50 taş», – tarif etti Canköy regionınıñ baş imamınıñ yardımcısı Lenur Yagyayev.
Malümatqa köre, cami imamı Rustem Ahmetşayev politsiyağa ariza yazdı, uquq qouryıcı organlar zaruriy taqiqat tedbirlerini keçirdi, köy sakinleri ve imamnı soraştırdılar, haber eteler QMDİde.
Uquq qoruyıcı organlarınıñ resmiy saytlarında bu aqta malümat şimdilk yoqtır.
Qırımda belgisiz şahıslar Canköy rayonı Küçük Alqalı (Zavet-Leninskiy) köyünde yerleşken caminiñ eki penceresini qırdı. Vaqia noyabr 14-ne keçer gecesi yüz bergendir.
Bu sene sentâbr ayında Aqmescitte Cuma cami qurucılığı yerinde belgisiz şahıslar bina isarında asılğan bir qaç levhanı boya ile lekeledi ve yırtıp qoydılar.
