Link açıqlığı

Qırım pоlitsiyası qırımtatarlarnıñ futbol matçında milliy timsallerni yasaq etecek oldı – Smedlâyev


Qırımda politsiya Amet-Han Sultan mukâfatına qırımtatar komandaları arasında keçirilgen futbol matçına qırımtatar milliy bayraqlarını ketirmege yasaq etecek edi.

Bu aqta Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev bildirdi.

«Yarışlarnıñ başlanuvında politsiya hadimleri maña qırımtatar milliy bayrağını kötermege yasaq etecek ediler. Yani, böyle emir yuqarıdan kelgendir, milliy timsallerni qullanuv yasağı, soñ künleri olğan vaqialar şunı tasdiqlay», – yazdı o Facebookta.

Onıñ sözlerine köre, böyle yasaqlar milletniñ özüni idare etüv aqqından vazgeçüvi ile bağlı «eserler» ve içinde qırımtatar bayraqları olğan maşinalarğa zarar ketirüv ile bir sırada tura.

«Bütün bu cinayetlerni etkenler alâ daa tapılmağan, camilerni ateşke bergenler ve hırsızlar, vandallar tapılmağanı kibi. Bütün bular akimiyetniñ indemez razılığı ile yapıladır, birinci nevbette, anda ketip, halqı içün ölmege söz bergenlerniñ razılığı ile», – qayd etti Smedlâyev.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG