Ukraina musulmanlarınıñ diniy idaresiniñ reisi Said İsmagilov Ukraina musulmaları adından Pariste teraktlar neticesinde elâk olğan ve zarar körgenlerge taziyelerini bildirdi.
«Terrorizm, zulum ve qabaatsız insanlarnıñ öldürüvini qatiyen takbih etemiz. Gunâlı cinayetlerni din ile aqlamağa mümkün degil, çünki Yüce Rabbimiz Muqaddes Quranda dey: «Bir insannı öldürgen insan dünya insanlarını öldürdi». Öldürilgen ve zarar körgenler içün dua oquymız, belâğa oğrağanlarğa taziyelerimizni bildiremiz», – yazdı Müfti Facebookta.
Onıñ sözlerine köre, ukrainler duşmannıñ ücümi ne olğanını bile, çünki olar da tesadüfiy ücümden biñlernen oğullarını coyğan.
Cuma künü keç aqşam Pariste birden bir qaç ücüm yüz berdi, neticede, soñki malümatqa köre, 120-den ziyade insan öldi.
Ücümler Paris merkezinde restoran yanında ve rok-kontsert keçirilgen kontsert salonınıda yüz berdi, soñkide reineler alındı. Paris civarında, Saint-Denis şeerinde, «Stade De France» stadionı yanında patlavlar yüz berdi.
Al-azırda teraktlar içün mesuliyetni özüne kimse almadı. Tahminlerge köre, ücümlerniñ islâmciler tarafından etilmesi mümkün.
