Link açıqlığı

Qırım mahkemesi «fevral 26 işi» iştirakçisiniñ şikâyet arizasını lâğu etip, onı apiste qaldırdı


Qırım Yuqarı mahkemesi cuma künü, noyabr 12-de, «fevral 26 işi» işitarkçisi Mustafa Degermenciniñ Aqmescitniñ Kiyev rayon mahkemesiniñ şeklengen şahısnı apiste noyabr 19-na qadar qaldırmaq qararına şikâyet arizasını lâğu etti.

Mahkeme toplaşuvı devamında Degermenciniñ advokatı Aleksandr Solodkov müşterisine apiste bulunuv ile bağlı olmağan cezanı bermege rica etti, çünki cinaiy iş boyunca taqiqat soñuna yetmedi ve tevqif içün sebep şimdilik yoq eken. Degermenciniñ özü de apiste bulunuv sebeplerini körmegenini qayd etti.

Öz nevbetinde, devlet qabaatlayıcısı aytqanı kibi, Degermenci içün ceza qararını deñiştirmek içün sebep yoq. Sözlerine köre, onıñ apiste bulunmasına keder ete bilecek tibbiy qarar da yoqtır.

Reislik yapqan Oleg Latınin, taraflarnın fikirlerini diñlep, Degermenci imayesiniñ şikâyet arizasını lâğu etti ve Aqmescit Kiyev rayon mahkemesiniñ qararını deñiştirmedi.

Advokat Solodkov Qırım Yuqarı Mahkemesiniñ qararını zıt köre, çünki «fevral 26 işi» boyunca taqiqat soñuna yetkendir. «Nasıldır bir taqiqat areketlerini yapmağa kerek dep, insannı apiste qaldırmaq mümkünmi, taqiqat da soñuna yetse endi?» – dedi Solodkov Qırım.Aqiqatqa.

Avdokatnıñ sözlerine binayen, işbu qararğa şikâyet etecek. Solodkovnıñ fikrine köre, noyabr 17 künü mahkeme Degermenciniñ apiste bulunuv müddetini uzattırır.

Mustafa Degermenci mayıs 7 künü Sudaqnıñ Suvuq Sala qasabasında yaqalandı.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı.

XS
SM
MD
LG