İş adamı, ATR telekanalınıñ saibi, Qırım vatandaşlıq qamaçavı boyunca aktsiyaınıñ idarecisi Lenur İslâmov aytqanı kibi, oña qarşı Rusiye uquq qoruyıcı organları tarafından açılğan cinaiy işniñ mündericesi evel Rusiyede öz başına ilân etilgen Çeçen Cumhuriyetiniñ prezidenti Cahar Dudayev ve çeçen boyevikleriniñ yetekçisi Şamil Basayevge nisbeten açılğan işlerniñ mündericesi kibidir.
«Bu maddelerge köre, elbette ki, tek interpol degil de, dünya mahsus hızmetleri qara cedvelge kirsetmeli. Olar nasıl inkişaf etecek, bilmeyim. Şamil Basayevniñ torunı ve Cahar Dudayev ğayeleriniñ, Meclis ve Ukraina tarafdarı olğanımdan soñ, tabiiy ki, maña bütün bu talarlar seslendirilecek ve, añlağanım köre, iqtisadiy talaplarnıñ olması da bekenile», – dey İslâmov.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.
Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñ Qırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlaу.
