Link açıqlığı

Qırım qamaçavı boyunca vatandaşlıq aktsiyasınıñ idarecisi Lenur İslâmov dey ki, Ukraina akimiyeti yarımadağa elektrik energiyasınıñ berilmesini toqtatmasa, aktsiya iştirakçileri Herson vilâyetinde elektrik tiremelerini qorumaycaq, olarnı bozmağa imkân berer.

Bunı o noyabr 11 künü Kiyevde matbuat konferentsiyası devamında bildirdi.

«Biz mında territoriyanı qoruymız. Bu topraqta turamız, dolaşamız. Nezaretimiz bar. Şunıñ içün biz, elbette ki, keder etmeycekmiz, nezaretimizni alırmız, tiremelerden çetleşirmiz. Tabiiy ki, Qırımdan ya daa bir yerlerden kelgen faallerge bunı yapmağa imkân berermiz», – dey İslâmov.

Noyabr 6 künü, Meclis teşebbüsi ile Kiyevdeki Rusiye Federatsiyasınıñ elçihanesi yanında keçirilgen narazılıq aktsiyasında Qırımtatar Milliy Meclisiniñ reisi Refat Çubarov ukrain ükümetini Qırımğa «iç olmağanda üç kün devamında» elektrik energiyasını bermemege çağırdı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Rusiye energetika nazirligi noyabr 11 künü aytqanı kibi, ukrain tarafı Qırımğa elektroenergiyasınıñ berilmesini tasdiqladı.

XS
SM
MD
LG