Aslı qırımtatar ukrain yırcısı Camala dey ki, birden em yahşı çalğıcı, em siyasetçi olmağa imkânsızdır, şunıñ içün bu eki yonelişni birleştirmemek çalışa ve muzıkağa sadıq qala.
Bunı o Qırım.Aqiqat Radiosınıñ aqşam efirinde bildirdi.
«Men bitaraf icadiy insan olmağa, bar küçümni buña sarf etmege tırışam. Bir şeyni yarı ğayret ile yapmağa imkânsız. Em yahşı siyasetçi, em yahşı yırcı olmağa çare yoq. <…> Siyaset – menim ikâyem degil, iç te», – dey o.
«Menimce, yır, inanıñ, bir yır, emiyetli, müim ğaye ile, azamiy samimiyet ile, bütün bu qanun leyhaları, konferentsiya ve forumlardan da çoq şeyni ayta bile. Çünki biz bunı köremiz, Okean Elzı (ukrain rok-taqımı – QA) stadionlarına baqıp köremiz. Siyasetçilerge köre, bu taqımğa ziyade inandılar», – dep qoştı yırcı.
Camala – aslı qırımtatar ukrain yırcısı. Muzıkası jazz, soul, elektron ve halq muzıkasını qaplap ala. Camala Oles Saninniñ «Povodır» filminde baş qadın rolüni icra etti.
