Qırımtatar Milliy Meclisiniñ reisi, halq deputatı Refat Çubarov dey ki, şimdi «işğal etilgen yarımadanı suniy sürette rusiyeliler ile tolduralar». Bunı o jurnalistlerge çarşenbe künü, noyabr 11-de, ukrain parlamentinde bildirdi.
«Rusiye Federatsiyası Qırımnıñ suniy sürette mesken etüv siyasetini keçire. Bir taraftan, riayetkâr olmağan ealini ve işğalnen razı olmağanlarnı quvmağa tırışacaq. Başqa taraftan, qıta ealisini, çeşit manaçıq tapıp, çoqlaştıracaq», – dey Çubarov.
Aytqanı kibi, Qırımnı rusiyeliler ile toldurğanları endi yarımadanıñ uquq qoruyıcı organlarında körüne.
«Şimdi Qırımğa 10 000 idareci yetişmegeni aqqında mesele resmiy seviyede muzakere etile. Böylece, işğalciler suniy sürette işğal etilgen territoriyada demografik, qavmiy ve diniy terkibini deñiştire», – dey Qırımtatar Milliy Meclisiniñ reisi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
