Link açıqlığı

Saatnıñ esas haberi

Hayser Cemilev Rusiye koloniyası şaraitlerine şikâyet etmey – advokat


Rusiyede maküm etilgen Hayser Cemilevniñ advokatı Nikolay Polozov onı Astrahan koloniyasında ziyaret etti. Advokatnıñ sözlerine köre, Hayser anda bulunuv şaraitlerine şikâyet etmey.

Bu aqta avdokat Twitterde yazdı.

«İK-10-da Hayser Cemilevnen körüştim. Özüni yahşı duya ve körüşüvimizge memnün edi», – dep yaza advokat.

«Bulunuv şaraitlerine Hayser şikâyet etmey. Koloniya yolbaşçılığı ricalarımı diqqat ile diñledi ve qarşı çıqmamaq vade ete», –d ep qoştı o.

Rusiye Federatsiyasında maküm etilgen Hayser Cemilev – qırımtatarlarnıñ milliy yetekçisi, Ukraina halq deputatı Mustafa Cemilevniñ oğlu – Astrahan şeeriniñ №10 koloniyasında buluna, dep bildire advokatı Nikolay Polozov.

Hayserniñ anası Safinar Cemileva Qırım.Aqiqatqa aytqanı kibi, Rusiye akimiyetinden oğlunıñ bulunuv yeri aqqında resmiy bildirüv öyle de yoq. Safinar Cemileva şunı da qayd etti ki, advokat Hayserniñ müddetten evel azat etilmesi aqta şefaatnı azırlamaq niyetindedir.

Rusiye Federatsiyasınıñ Yuqarı mahkemesi Hayser Cemilev içün Krasnodar diyarı mahkemesi tarafından berilgen beş yıllıq apis müddetini bir buçuq yılğa qısqarttı. Rusiye ükmü ve 2015 senesi aprel ayında Kiyevniñ Dnepr mahkemesi tarafından belgilengen müddet arasında üç aylıq farq bar – 3 yıl 8 ay.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Bıltır iyül 10 künü İnsan aqları boyunca Avropa mahkemesi Hayser Cemilevni SİZOdan azat etmek qararını çıqardı. Rusiye bunı yerine ketirmedi.

XS
SM
MD
LG