Link açıqlığı

Rusiye Federatsiyasında maküm etilgen Hayser Cemilev – qırımtatarlarnıñ milliy yetekçisi, Ukraina halq deputatı Mustafa Cemilevniñ oğlu – Astrahan şeeriniñ №10 koloniyasında buluna, dep bildire advokatı Nikolay Polozov.

«Hayser Cemilev şimdi Astrahan şeeriniñ №10 koloniyasında buluna. Amma onıñ ile körüşmege qolay degil», – yazdı o Twitterde.

Polozov dey ki, UFSİN (Cezalarnı yerine ketirüv federal hızmetiniñ idaresi) reberiniñ muavini ve idareniñ operativ bölüginiñ reberi ile körüşüvlerden soñ Hayser Cemilevge ziyaret cedvelini uyğunlaştırıp oldı.

«Soylarına Cemilevniñ işbu koloniyağa avuştırıluvı aqqında FSİN beyanatı öyle de kelmedi. Olarğa Rusiye poçtası vastasınen yollağandırlar», – yazdı advokat.

Hayserniñ anası Safinar Cemileva Qırım.Aqiqatqa aytqanı kibi, Rusiye akimiyetinden oğlunıñ bulunuv yeri aqqında resmiy bildirüv öyle de yoq. «Onıñ bu koloniyada olğanı aqqında resmiy haber yoq. Aileni haberdar etmediler», – dey o.

Safinar Cemileva şunı da qayd etti ki, advokat Hayserniñ müddetten evel azat etilmesi aqta şefaatnı azırlamaq niyetindedir.

Rusiye Federatsiyasınıñ Yuqarı mahkemesi Hayser Cemilev içün Krasnodar diyarı mahkemesi tarafından berilgen beş yıllıq apis müddetini bir buçuq yılğa qısqarttı. Rusiye ükmü ve 2015 senesi aprel ayında Kiyevniñ Dnepr mahkemesi tarafından belgilengen müddet arasında üç aylıq farq bar – 3 yıl 8 ay.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Bıltır iyül 10 künü İnsan aqları boyunca Avropa mahkemesi Hayser Cemilevni SİZOdan azat etmek qararını çıqardı. Rusiye bunı yerine ketirmedi.

XS
SM
MD
LG