İnterpol Ukraina şefaatı boyunca Qırımtatar Milliy Meclisiniñ reisi Refat Çubarovnıñ Rusiye teşebbüsi ile başlanılğan qıdıruvını toqtattı. Bunı İçki işler nazirliginiñ başı Arsen Avakov ukrain ükümetiniñ toplaşuvında bildirdi.
«Noyabr 6 künü İnterpol memleket-azaları adreslerine Rusiye Federatsiyası tarafından Rusiye topraq bütünliginiñ bouzuluvına çağıruvları içün vatandaş Refat Çubarovnıñ qıdıruvğa ilân etilgeni aqqında beyanat keldi», – dey o.
Avakovnıñ sözlerine köre, bu Çubarovnıñ 5 kanal efirinde Qırımnıñ Ukrainağa qaytarıluvı aqqında aytqanları ile bağlı.
«İnterpolnıñ ukrain bürosı Qırım – Ukraina mevamınıñ tarafdarıdır. Rusiye – Qırımda işğalci akimiyettir ve Çubarovnıñ halqara qıdıruvını toqtatmaq içün İnterpolnıñ merkeziy ofisine mütenasip şefaatnı yolladı… İnterpolnıñ baş kâtibiyeti bu işte er angi işbirlikniñ yasaqlanuvı aqqında qarar aldı, Çubarovnıñ halqara qıdıruvı ise toqtatıldı», – dey o.
Qırımnıñ Rusiye prokurorı Natalya Poklonskaya bildirdi ki, Qırımdaki Rusiye Federal havfsızlıq hızmeti idaresiniñ taqiqat bölügi Qırımtatar Milliy Meclisiniñ reisi Refat Çubarovğa qarşı cinaiy iş açtı. Onıñ aytqanına köre, cinaiy işniñ sebebi devletniñ topraq bütünligini bozmaq çağıruvları oldı.
Poklonskayanıñ qayd etkenine köre, cinaiy iş 280.1 maddesi boyunca (Rusiyeniñtopraq bütünligini bozacaq areketler yapılmasına çağıruv) açıldı.
Çubarovnıñ Rusiyege ve Rusiye işğal etken Qırımğa kirişi beş yılğa yasaq etildi. Faqat yaqında Qırımnıñ Rusiye prokurorı Natalya Poklonskaya bildirdi ki, Refat Çubarov Qırımğa kele bile, çünki onı mında «ilk taqiqat organları» bekley.
