Link açıqlığı

Qırım qamaçavı sebebinden Qırımda erzaq mallarınıñ fiyatı köterildi, amma yarımadadaki siyasiy vaziyet deñişmez. Bu Berkeley şeerindeki California universitetiniñ mütehassısı Yuriy Gorodniçenko ve Sheffield universitetiniñ – Aleksandr Talavera tarafından «Ekonomiçeskaya pravda» içün yapılğan Qırımnıñ «vatandaşlıq qamaçavı»nıñ effektivligi boyunca araştırmasınıñ neticesidir.

Araştırma müellifleri 98 erzaq malınıñ fiyatlarını ögrendiler. Olarnıñ avgust 25 – oktâbr 18-ne qadar aşğariy ve azamiy emiyeti nazarğa alındı.

«Qamaçav semerelidir – o Qırımda mal fiyatlarınıñ paalılaşuvına sebep oldı. Fiyatlar bir 10% arttı, «qıtaiy» Ukrainağa köre. Em de Qırımda fiyatlarnıñ ileride de paalılaşacağı tahmin etile. Bunıñ ile qamaçav tesiri pek büyük olmadı. Onıñ içün, işğal etilgen yarımadada siyasiy vaziyetni pek deñiştirip olamaz», – denile araştırmada.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG