Link açıqlığı

Ekspert: Qırımda Meclisniñ yarı gizli faaliyeti sebebinden qırımtatar diasporalarınıñ emiyeti artar


Qırımtatar Milliy Meclisi yarımada işğalinden evel çalışqanı kibi çalışamaz ve bu şaraitlerde qırımtatar diasporalarınıñ rolü artacaqtır. Bu kibi fikirni Yaqın şarqiy taqiqatlar merkeziniñ müdir muavini Sergey Danilov Qırım.Aqiqatqa bildirdi.

«Şimdi diasporalarnıñ rolü, türk, AQŞ ve Almaniyadaki, elbette ki, artacaq, çünki Meclisniñ yetekçi taqımı yarımadada idare etmek imkâniyetlerinden marum qaldı», – dey o.

Aynı zamanda, sözlerine köre, diasporalarnıñ rolüni abartmağa kerekmey.

Danilov şunı qayd etti ki, şimdi Qırımnıñ rusiyeli akimiyeti «esas kommunikator rolünе Müftiylikni «tayinlep», Meclis ve qırımtatar halqı arasında işançnı bozmağa» tırışa.

«Qırımtatar Milliy Meclisi içtimaiy institut, riayet etilgen, tanılğan ve uzun müddet devamında çalışqan qaide sisteması kibi qurulğandır», – dedi Danilov, ve «işğal şaraitlerinde Meclisniñ Qırımda istiqbali olmağanını» qayd etti.

Meclis reisi Refat Çubarov da Qırım.Aqiqatqa aytqanı kibi, eski faaliyetke qaytmağa imkân yoq.

Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.

Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.

XS
SM
MD
LG