Link açıqlığı

Saatnıñ esas haberi

Uquq qoruyıcı: qırımlılarnı Meclisni takbih etmege çağıralar


Qırımda Rusiye akimiyeti çeşit sebeplerni tapıp, Qırımtatar Milliy Meclisiniñ «umumhalq takbihini» meydanğa ketirecek ola. Bunı Qırımtatarlarnıñ aq-uquqlarını qorçalav komitetiniñ idarecisi, Meclis azası Eskender Bariyev bildirdi.

«Topraq meselesiniñ al etilüvi manasınen işğalci akimiyet memurları Qırımtatar Milliy Meclisini takbih etecek qararına rey berilecek toplaşuvlarda insanlarnıñ bulunmasını temin etmek istey. Afta evelsi aynı böyle vaqia Bağçasaray rayonında yüz berdi, bir 80 insan toplandı. İnsanlar topraq aqqında aytılacağını bekley edi, amma Qırımtatar Milliy Meclisini ve erzaq qamaçavını takbih etmege başladılar ve Qırımtatar Milliy Meclisini takbih etken rezolütsiyağa qol tutmağa teklif ettiler. İnsanları turıp çıqtılar», – yazdı Bariyev Facebookta.

Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.

Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.

XS
SM
MD
LG