Link açıqlığı

Qırım territoriyasında erzaq qıtlığı yoq, çarşıda vaziyet stabildir, dedi Qırım rusiyeli ükümetiniñ sanayı siyasetiniñ naziri Andrey Skrınnik noyabr 10 künü Nazirler şurasınıñ toplaşuvında.

Onıñ sözlerine köre, ealiniñ istimal ihtiyacı tam şekilde yerine ketirile.

Memurnıñ degeni kibi, yarımadada mal fiyatı Krasnodarğa köre ücüzcadır.

«Şuña diqqat ayrmağa isteyim ki, Qırımğa erzaqnıñ büyük bir qısmı Krasnodar diyarından ketirilse bile, aşayt mallarınıñ fiyatı episi bir ücüzcadır. Böylece, misal içün, Qırımda eñ kerekli aşayt mallarınıñ sepeti 3 645 ruble turacaq. Krasnodarda – 3 661, Moskvada – 4 200, Moskva vilâyetinde – 3 500 ruble», – dey Skrınnik.

İstimal çarşını ve Qırımda «fiyat stabilligini» teminlemek içün Qırımda er afta «raatlıq künü» yarmalığı keçe. Qırım «mal qamaçavı»nıñ başlanmasından berli yarımadada yarmalıqlar daimiy sürette keçirile.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG