Link açıqlığı

Qırım camilerinde ekstremiz teşkerüvi sebebinden musulman diniy cemiyet temsilcileri ile körüşeler. Bunı Qurman rayonınıñ rusiyeli memuriyetiniñ matbuat hızmeti bildire.

«Qurman qasabasında «Cangara» musulmanlarnıñ yerli diniy teşkilâtınıñ camisinde Qırım ve Aqyar musulmanları diniy idaresi 05.11.2015 senesi saat 9:30 ekstremizm meselelеri boyunca iş körüşüvi keçti. Körüşüvde musulmalarnıñ yerli diniy teşkilâtlarınıñ imamları, Qurman rayonı mesken yerleriniñ musulman cemiyetleriniñ mollaları, Qurman rayonı memuriyetiniñ Qırımdan repressiyalarğa oğrağan halqlarnıñ abadanlaştıruvı ve milletlerara munasebetler boyunca bölüginiñ hadimleri, Qurman rayonı prokuraturasınıñ hadimi iştirak ettiler», – denile matbuat hızmetiniñ beyanatında.

Matbuat hızmetinde bildirilgeni kibi, körüşüv devamında «Rusiye Federatsiyasınıñ ekstremizm ve terrorizmge qarşılıq aqqında qanunınıñ temelleri aydınlatıldı, Qurman rayonı territoriyasında ekstremizm ve terrorizm profilaktikası ile bağlı meseleler muzakere etildi».

Uquq qoruyıcılar bildirgeni kibi, Qırımda musulmanlarnı FSB ile subetlerge davet eteler. Em de Qırım uquq qoruyıcı gruppasında aytılğanı kibi, Qırımnıñ rusiyeli akimiyeti ve mahsus hızmetleri musulman diniy cemiyetleriniñ işine qarışa.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG