Qırımtatar Milliy Meclis azası, qırımtatarlarnıñ aq-uquqlarını qorçalav komitetiniñ idarecisi Eskender Bariyev dey ki, qırımtatarlar Qara deñiz regionında vaziyetniñ tertipleşüvinde büyük rol oynay.
Bu aqta o Qırım.Aqiqatqa İstanbulda noyabr başında keçirilgen forum neticeleri aqqında aytqanda bildirdi.
«Qırımtatarlarnıñ vazifesi – öz tecribe, öz faciasına tayanıp, region stabilleşüvine isse qoşmaq. Halqımız içün ğayet müimdir», – dey o.
Aytqanı kibi, işbu ketişat teşebbüsçileri Ukrainanı temsil etken qırımtatarlardır.
«Qırımtatarlarnıñ vazifesi – Ekinci cian cenkinden soñ qurulğan halqara uquqiy tertibatnıñ işlep kelmesine isse qoşmaq. Region devletlerinde yaşağan qırımtatarlarnı celp etmege tırışacaqmız», – dep qoştı Bariyev.
İstanbulda (Türkiye) «Qırım Qara deñiz regionınıñ havfsızlığı çerçivesinde: mesele ve istiqbal» halqara forumı keçe, mında Qırımnıñ Ukrainağa qaytaruv srategiyasını taqdim ettiler.
Forum işinde Azerbaycan, Ermenistan, Gürcistan, Moldova, Romaniya, Rusiye, Türkiye, Ukraina, Almaniya, Poloniya ekspertleri iştirak etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
