Cumaertesi künü, noyabr 7-de, Bağçasaraynıñ Han sarayını Qırım akimiyeti ziyaret etti. Sarayğa Qırımnıñ rusiyeli başı Sergey Aksenov, Qırım ükümetiniñ şimdiki baş nazir muavini Ruslan Balbek, Qırım musulmanlarınıñ müftisi hacı Emirali Ablayev kelgen edi, dep bildire QHA.
Olarnen birlikte «Rossiya1» çıqaruv taqımı keldi. Belli olğanı kibi, telekanal yarımadada «Vatan neden başlana» serlevalı vesiqalı filmni çıqara.
Han sarayından Aksenov ve Qırımda rusiyeli akimiyetnin diger temsilcileri yarımadada, olarnıñ fikrine köre, yaşayış nasıl deñişkeni ve olarnıñ qırımtatarlar ile munasebetleri aqqında tarif ettiler.
Bunıñ ile sarayğa bir qaç qırımtatarı kelip, Qırımnıñ şimdiki yolbaşçılığına sual qoydı. Şu cümleden, Büyük Han Camisi ne zaman tamirlene ve işke açılacağı aqqında soradılar.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
