Qırım Muhtar Cumhuriyetinden köçip kelgenlerniñ sayısı resmiy statistikağa köre, eñ azından, eki qat büyüktir, dep yaza «Zerkalo nedeli.Ukraina» neşiri.
«Devlet işğal etilgen territoriyalarda vatandaşları aqqında unuttı degende, şunı qayd etmek kerek – çoqusı aqqında iç te bilmey… halqara teşkilâtlar, devlet organları tarafından bildirilgen bir buçuq million raqamı özüne bürokratiyağa tayanıp, köçip kelgen şahısnıñ malümat kâğıtını alğan insanlarnı qaplap ala. Adet üzre, bular – içtimaiy yardımğa muhtac olğan insanlardır», – qayd ete maqale müellifi.
Adet üzre, «siyasiy icretçilerniñ» büyük qısmı qıtada yaşayışını öz başına qura. Şunıñ içün, Qırımdan köçip kelgenlerniñ teşkilâtlarında bildirilgeni kibi, Qırımda «rus dünyasından» qaçqanlarnıñ aqiqiy sayısı eki qat yüksektir.
BMT esabatına köre, Ukrainada Qırım ve Donbasstan 1 438 000 köçip kelgen insan bar.
Qırımtatar Milliy Meclisinde Qırımnı terk etken 15 biñ vatandaş bar olğanı aqqında bildireler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
