Aqyarda noyabr 10 künü Rusiye Federatsiyasında yasaq etilgen Hizb ut-Tahrir teşkilâtınıñ faaliyetine alâqası bar olğanında şeklengen Ruslen Zeytullayevniñ işi boyunca mahkeme toplaşuvı keçirilecek.
Bunı Facebookta faali Nariman Memedeminov bildirdi.
«Aqyardaki balalarnıñ işi boyunca mahkeme toplaşuvı noyabr 10 künü saat 11:30 Suvorova meydanında keçirilecek. Belli olğanı kibi, makeme Zeytullayev Ruslannıñ işine baqacaq», – yazdı o.
Bu sene fevral ayında Aqyar şeer mahkemesi Aqyar sakini Ruslan Zeytullayevniñ tevqifi boyunca qararını tasdiqladı.
Zeytullayev, Nuri Primov, Rustem Vaitov yanvar soñunda FSB hadimleri tarafından yaqalandılar. Qırım advokatı Emil Kürbedinovnıñ sözlerine köre, üçü de bir vaqıtları Ukraina havfsızlıq hızmetiniñ nezareti altında buluna edi, amma olarnıñ işbu teşkilâtqa alâqası tasdiqlanılmağan edi.
