Link açıqlığı

Bütündünya qırımtatar kongressiniñ icraiy komiteti nevbetteki toplaşuvını Geniçeskte keçirecek – Çubarov


Bütündünya qırımtatar kongressiniñ icraiy komiteti nevbetteki toplaşuvını Herson vilâyeti Geniçeskte keçirecek ola. Bunı Meclis reisi Refat Çubarov bildirdi.

«BQTK İcraiy komitetiniñ toplaşuvı eki ayda bir kere keçirile. BQTK İcraiy komitetiniñ birinci toplaşuvı Köstence (Romaniya), ekincisi – Kivde keçirildi. Üçüncisi Varşavada (Poloniya) keçirilmek kerek edi, amma İcraiy komitetiniñ qararına köre, üçünci toplaşuvnı (2016 senesi yanvar ayı) Geniçeskte (Herson vilâyeti) keçirecekmiz», – yazdı Çubarov Facebookta.

Avgust başında Türkiye paytahtı Ankarada II Bütündünya qırımtatar kongressi keçirildi, mında qırımtatarlarnıñ Vatanı – Qırımdaki vaziyeti muzakere etilgen edi. Şu cümleden, beyanatta qayd etilgeni kibi, Sovet Birliginiñ dağıluvından soñ Vatanına qaytqan 350 biñ qırımtatarı şimdi kene totalitar basqı ve yoq olmaq havfı astında buluna. Forumda BQTK İcraiy komiteti saylanıldı.

Rusiye Qırımnı 2014 senesi baarde işğal etkeninden soñ, 15 biñ qırımtatarı Qırımnı terk etmege mecbur oldı, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.

XS
SM
MD
LG