Ukrain ükümeti «Qırımnıñ işğalden azat etilmesi meselesinde bütün usullarnı» qullanmalı, dedi Qırım.Aqiqat aqşam efirinde Qırımtatar halqınıñ aq-uquqlarını qoruv komitetiniñ idarecisi Sinaver Kadırov. O dey ki, «Rusiye qolay kelgen ve ketken bir memleket degildir».
Qırımtatar halqınıñ aq-uquqlarını qoruv komitetiniñ idarecisi dey ki, noyabr 6 künü Kiyevde Rusiye elçihanesi yanında qırımtatar halqınıñ temsilcileri tarafından teşkil etilgen aktsiya devamında tek Rusiye degil de, ukrain akimiyetine de talaplar bildirildi.
«Ukraina ükümetine berilgen bütün talaplarnı aytmacam, amma aktsiya teşkilâtçılarınıñ esas maqsadı – Ukrainanı Qırımnıñ işğalden azat etilmesinde siyasiy iradesiniñ kösterilmesine çağırmaq», – qayd etti Sinaver Kadırov.
Aytqanına köre, «Qırım Rusiyege paalığa tüşse, Rusiye Qırımnı tezce terk eter».
«Rusiye arbiyleri Sivaşnıñ o bir tarafında olğanda, birazdan ise Qırımğa kirgeni, menimce, nasıldır bir gizli muzakereler neticesinde yüz berdi. Bundan qorqam, Rusiyeniñ bir de bir işmarı ola bile edi. Aynı o zaman Rusiye Qırım meselesinde er şeyni öz faydasına yapa bilecegine işandı», – dey Kadırov, bundan soñ kene de ukrain akimiyetine siyasiy iradeni köstermege kerek olğanını qayd etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
