Ukraina prezidentiniñ qırımtatar halqı işlerinden vekâletlisi Mustafa Cemilev ve Qırımtatar Milliy Meclisiniñ reisi Refat Çubarov OSCE milliy azlıqlarnıñ aq-uquqları boyunca Yuqarı komissarı Astrid Torhs ile Qırımda insan aqlarınıñ bozulması ile bağlı meselelerni muzakere ettiler.
Bunı Qırımtatar Milliy Meclisiniñ matbuat hızmeti bildire.
«Bugün, noyabr 6-da, Kiyevde qırımtatarlarnıñ milliy lideri Mustafa Cemilev ve Qırımtatar Milliy Meclisiniñ reisi Refat Çubarovnıñ OSCE milliy azlıqlarnıñ aq-uquqları boyunca Yuqarı komissarı Astrid Torhs ile körüşüvleri olıp keçti. Muzakere etilgen meseleler arasında – qırımtatarlarğa qarşı yapılğan ayırım ve basqılar», – dep aytıla haberde.
Çubarov Qırımda basqığa oğrağan er kesni Ukraina Baş prokuraturası yanındaki Qırım Muhtar Cumhuriyetiniñ prokuraturası ve Kiyevdeki Meclis temsilciligine ariza bermege çağırdı.
Cuma künü, noyabr 6-da, Meclis vekilleri qırımtatar teşkilâtlarınıñ temsilcileri ile beraber Kiyevdeki Rusiye Federatsiyasınıñ elçihanesi yanında barışıq narazılıq aktsiyasını keçirdiler. Soñki künleri Qırımda qırımtatarlarğa qarşı basqı artmağa başladı.
Noyabr 2-de saba ATR qırımtatar telekanalınıñ sabıq hadimleri Lilâ Bucurova ve Elzara İslâmovanıñ, em de telekanal saibi Lenur İslâmovnıñ ana-babası yaşağan evlerinde ve Moskvadaki evinde tintüvler yapıldı.
Qırımdaki Rusiye Federal havfsızlıq hızmetiniñ idaresi bildire ki, tintüvler ATR saibine qarşı açılğan cinaiy iş çerçivesinde keçirile.
Ukraina Tışqı işler nazirligi qırımtatar kütleviy haber vastalarına qoltutqanını bildirip, noyabr 2 tintüvlerini «olmaycaq basqı» dep adladı.
Rusiye 2014 senesi mart ayında Qırımnı işğal etti. Ukraina ve Ğarp memleketleri yarımadanı vaqtınca işğal etilgen topraq dep sayalar.
