Rusiye Federal havfsızlıq hızmetiniñ (FSB) yolbaşçısı Aleksandr Bortnikov «Kogalımavia» şirketiniñ A-321 yolcu uçağı tüşmesiniñ sebepleri ögrenilgenine qadar Rusiyeniñ Mısır uçuşlarını toqtatmaq kerek, dep tüşüne.
«Qazanıñ sebepleri aqqında obyektiv ve isbatlanğan malümat almaq kerekmiz. Bu em felâket sebepleriniñ taqiqatı, em de cemaatnı haberdar etmek içün lâzim», – dep ayttı Bortnikov.
FSB yolbaşçısı bildirdi ki, Rusiyeniñ Terrorizmge qarşı milliy komiteti Mısırda Rusiye uçağı tüşken soñ uçuşlarnıñ havfsızlığı ile bağlı qoşma tedbirlerni alıp baracaq.
Oktâbr 31-de Rusiye şirketine ait A-321 uçağı Sina yarımadasında tüşti. Uçaq Şarm El Şeyhten Rusiyeniñ Sankt-Peterburg şeerine yol alğan edi. Uçaqta olğan 224 kişi elâk oldı. Felâket qurbanları arasında – dört Ukraina vatandaşı.
Noyabr 4-te Mısırda Rusiye uçağında patlav yüz bergenini bildirdiler, amma sebepleri daa belli degil. Felâketniñ bir qaç resmiy olmağan versiyası bar – terakttan başlap ekipaj hatasına qadar.
