Qırımtatar Milliy Meclisiniñ reisi Refat Çubarov Qırımda basqığa oğrağan er kesni Ukraina Baş prokuraturası yanındaki Qırım Muhtar Cumhuriyetiniñ prokuraturası ve Kiyevdeki Meclis temsilciligine ariza bermege çağıra.
Çubarov QMC prokuraturasınıñ onıñ Qırımda «ğıyabiy apiske aluv» ile bağlı arizasına cevabı tez kelgenini qayd etti.
«Qırımda zarar körgen ve basqığa oğrağan ya da tuvğanları ve yaqınlarına basqı yapılğan er kesni Ukraina vatandaşlarına qarşı yapılğan bu cinayetler aqqında Qırım Muhtar Cumhuriyetiniñ prokuraturasına bildirmege çağıram», – dep yazdı o Facebookta.
«Bunıñ kibi arizalarnı üçünci şahıs üzerinden QMC prokuraturasına ya da Kiyevdeki Meclis temsilciligine bermek mümkün... Bunı boşuna yapacağıñıznı tüşünmeñiz – er bir cinayetçi ve oña yardım etkenlerni mıtlaqa tapacaqmız», – dep qoştı o.
QMC prokuraturası Çubarovnıñ «ğıyabiy apiske alınmasını» qanunsız sayıp, cinaiy taqiqat açtı. İş malümatları Ukraina Baş prokuraturasına berildi, dep bildireler QMC prokuraturasında.
Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarov oktâbr 28-de Facebook saifesinde Aqmescitniñ Kiyev rayon mahkemesi çıqarğan qararnı yerleştirdi. Oña binaen, Meclis reisi ğıyabiy şekilde apiske alına.
Qırımnıñ Rusiye prokurorı Natalya Poklonskaya bildirdi ki, Qırımdaki Rusiye Federal havfsızlıq hızmeti idaresiniñ taqiqat bölügi Qırımtatar Milliy Meclisiniñ reisi Refat Çubarovğa qarşı cinaiy iş açtı. Onıñ aytqanına köre, cinaiy işniñ sebebi devletniñ topraq bütünligini bozmaq çağıruvları oldı.
Poklonskayanıñ qayd etkenine köre, cinaiy iş 280.1 maddesi boyunca (Rusiyeniñ topraq bütünligini bozacaq areketler yapılmasına çağıruv) açıldı.
QMC prokuraturası Qırım mahkemesiniñ qararını körgen soñ Qırım cumhuriyetiniñ «akimiyet organları», şu cümleden, Aqmescitniñ Kiyev rayon mahkemesi, Qırım ve Aqyar boyunca Federal havfsızlıq hızmetiniñ İdaresi qanunsız şekilde meydanğa ketirilgenini» qayd etti.
Çubarovnıñ Rusiyege ve Rusiye işğal etken Qırımğa kirişi beş yılğa yasaq etildi. Faqat yaqında Qırımnıñ Rusiye prokurorı Natalya Poklonskaya bildirdi ki, Refat Çubarov Qırımğa kele bile, çünki onı mında «ilk taqiqat organları» bekley.
