Link açıqlığı

Qırım deputatı: Rusiye terkibinde qırımtatarlarnıñ milliy devletçiligi aqqında aytmaq erte


Qırımnıñ Rusiye parlamentiniñ «Yedinaya Rossiya» deputatı Lentun Bezaziyevniñ fikirince, Rusiye terkibinde qırımtatarlarnıñ milliy devletçiligi aqqında aytmaq daa erte, çünki halqnıñ medeniy ihtiyaclarını qarşılamaq imkânları şimdi de bar.

Bunı o «Qırım» Rusiyege qoltutqan teşkilâtınıñ faallerinden biri Murat Yazıciyevniñ Qurultaynıñ vesiqalarında qayd etilgen devletçilik planlarından vazgeçmek çağıruvlarını izaatlap, Qırım.Aqiqatqa bildirdi.

Bezaziyev Rusiye prezidenti Vladimir Putinniñ qırımtatar halqınıñ reabilitatsiyası aqqında buyruğı, «Millet» qırımtatar telekanalınıñ açılması, em de qırımtatar tilinde çıqqan neşirlerniñ Rusiye bücetinden maliye etilmesini Rusiyeniñ Qırım işğali vaqtında olğan müsbet deñişmeler dep adladı.

«Qırımtatarlarğa muhtariyet kerekmey, dep aytmayım, 2020 senesine qadar işimiz bar, soñra ömür kösterir», – dep ayttı deputat Qırım.Aqiqatqa.

Qırım saytlarınıñ birinde Murat Yazıciyevniñ «milliy mustaqil devletçilik ğayesi manasını coya ve yañı ğaye aktual ola» kibi beyanatı peyda oldı.

Qırımtatar Milliy Meclisi faalniñ beyanatını «yerli satqınlarnıñ şahsiy ğayesi» olaraq adlandırıp, milliy ğayeden vazgeçüv sebeplerini «Rusiye federativ devletiniñ tarihını bilmegeninen» bağlaylar.

XS
SM
MD
LG