Qırımnıñ rusiyeli akimiyetiniñ başı Sergey Aksenov Aqmescit ve Aqmescit rayonınıñ birleşüvini maqsatqa uymağan bir şey olaraq tanıy. Bu aqta Qırımnıñ rusiyeli ükümetiniñ matbuat hızmeti cumaaqşamı künü, noyabr 5-de, bildirdi.
Aksenovnıñ fikrine köre, memuriy-territorial qurulışınıñ deñişmesi ile bağlı meseleler «bütün Qırım miqyasında al etilmeli».
O dey ki, evel şeer ve rayonnıñ ola bilecek birleşüvi aqta meseleniñ çezilmesi içün mahsus iş gruppası teşkil etildi.
«Aqmescit şeeri ve Aqmescit rayonınıñ ola bilecek birleşüviniñ muzakeresi cemaatta ğayet faal edi. Bu aqta fikirler bölüşti. Neticede, Aqmescitniñ ve Aqmescit rayonınıñ birleşüvi maqsatqa uymağan bir şey olğanı aqqında qarar alındı», – dey Aksenov.
O şunı da qoştı ki, birleşüv «işbu territoriyalarda idare etüvni boza bile». «Aqmescit rayonı – Qırımda eñ büyük rayonlardan biridir. Onıñ territoriyasında yerleşken yüzden ziyade mesken yer bar. Bazıları çoqtan ayrı memuriy birlem olaraq inkişaf ete. Rayonnıñ iqtisat ve içtimaiy infrastrukturası musaviy şekilde ilerilemegen», – dey Aksenov.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
