Cemaat erbapları, uquq qoruyıcılar ukrain akimiyetini Qırımda insan aqlarınıñ qoruvında muntazam yanaşuvı olmağanı içün tenqit eteler. Bunı Kiyevde matbuat konferentsiyası devamında «Krım.SOS» cemaat teşebbüsiniñ halqara gumanitar uquqı boyunca mütehassısı Yevgeniya Andreyük bildirde, haber ete Qırım.Aqiqat mühbiri.
«Ukrain akimiyetiniñ areketleri pek zayıf. Ukrain akimiyetiniñ qırımlılarnıñ aqları qoruvı boyunca muntazam yanaşuvını körmeymiz. Ne olsa da, Ukraina Rusiyege qarşı İnsan aqları boyunca Avropa mahkemesine bir qaç davanı bergen edi», – dey Andreyük.
Ekspert şunı da qayd etti ki, Ukrainağa diplomatik imkâniyetlerinden faal sürette faydalanmaq kerek.
«Ukraina BMT havfsızlıq şurasınıñ muvaqqat azası oldı ve bu Ukraina içün bayağı diplomatik imkâniyetlerni aça, pek yahşı meydançıq, pek yahşı forumdır. Daimiy muntazam yanaşuv omlalı. Ukrain akimiyetinden talap etkenimiz budır», – dey o.
Soñki künleri Qırımda qırımtatarlarğa qarşı repressiyalarnıñ yañı aqımı başlandı.Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.
Qırımnıñ Rusiye Federal havfsızlıq hızmeti (FSB) idaresiniñ malümatına köre, tintüvler ATR saibine qarşı açılğan cinaiy iş çerçivesinde keçirile.
Ukraina İçki işler nazirligi ATR qırımtatar telekanalınıñ müdiri Lenur İslâmov ve telekanalnıñ sabıq hadimleriniñ evlerinden keçirilgen tintüvler, em de Qırım işğaline qarşı çıqqan cemaat teşkilâtlarınıñ faaliyetine keder etüv kibi insan aqlarınıñ bozulması boyunca eki cinaiy taqiqatqa başladı.
Ukrain nazirliginde berilgen malümatqa köre, cinayet malümatları mahsus bazağa kirsetildi. Sentâbr 20-de qırımtatar liderleriniñ teşebbüsi ile Qırımğa aşayt mahsulatı ve mallarını alıp ketken yük naqliyatını blok etüv aktsiyası başlandı.
