Cuma künü, noyabr 6-da, Qırımtatar Milliy Meclisiniñ temsilcileri qırımtatar teşkilâtlarınıñ vekilleri ile Kiyevde Rusiye Federatsiyası elçihanesi divarları yanında narazılıq numayışını keçirecekler. Bunı Ukraina haber siyaseti naziri Emine Ceppar Kiyevde matbuat konferentsiyası devamında bildirdi, haber ete Qırım.Aqiqat mühbiri.
Ceppar aytqanı kibi, aktsiya çerçivesinde Rusiye elçihanesi yanında Qırımda Rusiye akimiyeti tarafından qırımtatarlar ve Ukraina vatandaşlarına nisbeten etilgen repressiyalarına qarşı fleşmob keçirilecek.
«Fleşmob iştirakçileri – maska kiygen gençler – elçihane yanında indemeyip turacaq, böyleliknen Qırım ve Rusiyede yüzüni köstermek ve öz vatandaşlıq mevamını açıqtan bilidirmege mümkün olmağanını kösterecekler. Bu maskalar serbest fikir ve onıñ bildirüvi yasaq olğanını temsil etecek», – dey Ceppar.
Aktsiya saat 15:00 başlanacaq.
Soñki künleri Qırımda qırımtatarlarğa qarşı repressiyalarnıñ yañı aqımı başlandı.
Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.
Qırımnıñ Rusiye Federal havfsızlıq hızmeti (FSB) idaresiniñ malümatına köre, tintüvler ATR saibine qarşı açılğan cinaiy iş çerçivesinde keçirile.
Ukraina İçki işler nazirligi ATR qırımtatar telekanalınıñ müdiri Lenur İslâmov ve telekanalnıñ sabıq hadimleriniñ evlerinden keçirilgen tintüvler, em de Qırım işğaline qarşı çıqqan cemaat teşkilâtlarınıñ faaliyetine keder etüv kibi insan aqlarınıñ bozulması boyunca eki cinaiy taqiqatqa başladı.
Ukrain nazirliginde berilgen malümatqa köre, cinayet malümatları mahsus bazağa kirsetildi. Sentâbr 20-de qırımtatar liderleriniñ teşebbüsi ile Qırımğa aşayt mahsulatı ve mallarını alıp ketken yük naqliyatını blok etüv aktsiyası başlandı.
