Link açıqlığı

Saatnıñ esas haberi

Özbekistanda qalğan qırımtatar ressamınıñ icadı Qırımda kösterile


Aqmescitte ressam evinde sürgnlikten soñ Özbekistanda yaşağan qırımtatar ressamı Kâzim Eminovnıñ «Üzülgen yol» sergisi numayış etile, dep bildire Qırım.Aqiqat mühbiri.

Seyircilerniñ diqqatına 59 işi taqdim etilgen – 30 resim ve 29 fotoreproduktsiyası, asıl nushaları Özbekistan Cumhuriyetiniñ müzeylerinde saqlanıla. İcatnıñ farqlı yılları yazılğan resim ve grafikaları.

Eykeltraş ve ressam Ayder Aliyev aytqanı kibi, Qırımda Kâzim Eminovnıñ icadı ile az tanışlar ve işlerniñ sergisini endi çoqtan azırlamağa kerek edi. «Teessüf ki, işleriniñ esas qısmı Özbekistan müzeylerinde saqlı. Kâzim Eminov aqqında studentlerge tarif etmege kerek, buña lâyıqtır», – dey o.

Halqnıñ Qırımğa avdet olunuvı oğrunda faal küreşken, Golos Ameriki ve Radio Svobodanıñ sabıq mühbiri, SSCBde sürgün etilgen halqlarnıñ ayırımı ve sovet rejiminiñ cinayetleri aqqında bütün dünyağa tarif etken Ayşe Seytmuratova onıñ porteri nasıl yazılğanını hatırlay: «Özümni meşin plaşçta ve başımda qırmızı şal ile körgende, soradım: Ne içün? Men antikommunistim de. Kâzim maña dey: Sen – qırımtatar halqınıñ komissarı. Vaqıt öyle».

Kâzim Eminov – qırımtatar ressamı, 1944 senesi mayısta qırımtatar halqınıñ sürgünligini aks etken resimlerniñ müellifi Rustem Eminovnıñ babası ola.

Kâzim Eminov 1928 senesi mayıs 24-de Qırım Muhtar SSC-niñ Aluşta şeerinde dünyağa kele. Balalıqtan resim yapmağa seve. Aqmescitte belli ressam Nikolay Samokişniñ studiyasında şegirt ola.

Qırımtatar medeniy-tarihiy asabalığı müzeyinde bu ressamnıñ bir işi bile taqdim etilmegen. Özbekistan SSC medeniyet erbabı, 1955 senesinden – SSCB Ressamlar birliginiñ azası ola. Taşkent devlet pedagogik universitetiniñ ressamcılıq kafedrasınıñ dotsenti olaraq çalışa edi.

1976 senesi yol qazasında vefat etti.

Sergi noyabrniñ ortasına qadar devam etecek.

XS
SM
MD
LG