Link açıqlığı

Çubarov Radada Ukraina Nazirler kabinetinden Qırımğa elektrik energiyasınıñ berilmesini toqtatmağa talap etti


Qırımtatar Milliy Meclisiniñ reisi, Ukraina halq deputatı Refat Çubarov (Blok Petra Poroşenko firqası) Ukraina ükümetindеn şu künleri Qırımğa elektrik energiyasınıñ berilmesini toqtatmağa talap etti.

«Qırımda işğalcilerge küç bergen yekâne resurs – elektrik energiyasınıñ berilmesi. Biz Qırımda ayırımlarnıñ yañı aqımını toqtatmaq içün ükümetke yaqın künleri ükümet qararını almaq ve Ukraina vatandaşlarına qarşı ayırımlarnı toqtamtaq içün Qırımğa elektrik energiyasınıñ berilmesini lâğu etmek talabımız ile muracaat etemiz», – dedi Çubarov noyabr 4 künü Yuqarı Radanıñ toplaşuvında.

Onıñ sözlerine köre, soñki künleri yarımadada Ukraina vatandaşları – qırımtatarlarğa qarşı ayırımlar faalleşti. «İşğalciler şaşmaladı, şunıñ içün soñki künleri qırımtatarlarğa, Qırımnıñ «vatandaşlıq» qamaçavınıñ faallerine ve aile azalarına nisebeten ayırımlarğa başladı».

Siyasetçi Ukrainanı Qırımda vatandaşlarınıñ aqlarını qorumağa çağırdı.

«Ükümet ileride de uzatsa, böyle vaziyette özüni, qorantalarını qorçalamağa mecbur olğan insanlar Ukraina qanuniyetine köre, Ukraina topraq bütünliginiñ ve yaşayışınıñ qoruvı boyunca qararlarnı ala bile», – qayd etti Çubarov.

Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.

Qırımnıñ Rusiye Federal havfsızlıq hızmeti (FSB) idaresiniñ malümatına köre, tintüvler ATR saibine qarşı açılğan cinaiy iş çerçivesinde keçirile.

Noyabr 2-de saba Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñ Qırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.

Ukraina İçki işler nazirligi ATR qırımtatar telekanalınıñ müdiri Lenur İslâmov ve telekanalnıñ sabıq hadimleriniñ evlerinden keçirilgen tintüvler, em de Qırım işğaline qarşı çıqqan cemaat teşkilâtlarınıñ faaliyetine keder etüv kibi insan aqlarınıñ bozulması boyunca eki cinaiy taqiqatqa başladı.

Ukraina Baş prokuraturası yanındaki QMC prokuraturasında da işbu vaqialar boyunca cinaiy iş açıldı.

XS
SM
MD
LG