Qırımnıñ rusiyeli akimiyetiniñ başı Sergey Aksenov dey ki, «Qırım inkişafınıñ temeli halq birligindedir».
Bu aqta onıñ Rusiye ve Qırımda noyabr 4 künü qayd etilgen Halq birligi kününe hayırlav sözlerinde aytıla.
«Biz em quvanç, em kederde birliktemiz. Bunı Mısır kökü üzerinde olğan deşetli felâket tasdiqladı. Halq birligi Rusiyeniñ, Qırımnıñ zemaneviy tarihiy şaraitlerinde inkişaf temelidir».
Qırımnıñ rusiyeli başı dey ki, «Qırım baari vaqtında çeşit millet vekilleri aqlarını birlikte qorçalay edi» ve, Aksenovnıñ degeni kibi, «ukrain işğalini toqtattı».
Aksenovnıñ sözlerine köre, Qırım «iqtisat ve içtimaiy saalarda müsbet neticelerge irişti».
Halq birligi Künü – Rusiye devlet bayramı. 2005 senesinden noyabr 4-de qayd etile.
Ukraina Yuqarı Radası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq belgiledi. Ğarp memleketleri Qırım işğalini tanımay ve bir sıra iqtisadiy cezalarnı kirsete. Rusiye yarımadanıñ işğalini red ete ve bunı «tarihiy adaletniñ qaytarılması» olaraq adlay.
