Ukraina prezidenti Petro Poroşenko Rusiye nezareti altında olğan Qırmda «ukrain jurnalistleri üzerinde horlav»nı mümkün olmağan bir şey olaraq tanıy.
Böyleliknen nazir noyabr 2 künü ATR qırımtatar telekanalınıñ sabıq hadimleriniñ ve telekanal saibiniñ ana-babasınıñ evlerinde keçirilgen tintüvlerni izaatladı.
«Belli qırımtatar jurnalisti Liliya Bucurovanıñ ve ATR kanalı hadimleriniñ evlerinde keçirilgen tintüvler – yarımadada insan aqlarınıñ nevbetteki bozuluvı ve itibarını saqlağan ve Qırım işğalini tanımağan vatandaşlarımızğa intiqam ıntıluvıdır» , – denile Poroşenkonıñ beyanatında.
Onıñ fikrine köre, Qırım tintüvleri oktâbr 30 künü BMT 7-nci Baş assambleyası çerçivesinde 36 devletniñ Qırım insan aqları saasındaki vaziyeti aqqında qabul etilgen añlaşmasına ters kele.
Noyabr 2-de saba Qırımda ATR telekanalınıñ sabıq hadimleri Lilâ Bucurova, Elzara İslâmova ve telekanal saibi Lenur İslâmovnıñ ana-babası yaşağan evleri, em de Moskvadaki evinde tintüvler yapılmağa başladı.
Qırımnıñ Rusiye Federal havfsızlıq hızmeti (FSB) idaresiniñ malümatına köre, tintüvler ATR saibine qarşı açılğan cinaiy iş çerçivesinde keçirile.
Noyabr 2-de saba Rusiyeniñ Merkeziy bankı İslâmovğa ait OOO «Cast Bank» müessisesiniñ litsenziyasını lâğu etti. Qırımtatar iş adamınıñ Qırım.Aqiqatqa bildirgenine köre, bu tedbirlerni Qırım qamaçavı ile bağlay. O, onıñ teşkilâtçılarından biri ola.
Ukraina İçki işler nazirligi ATR qırımtatar telekanalınıñ müdiri Lenur İslâmov ve telekanalnıñ sabıq hadimleriniñ evlerinden keçirilgen tintüvler, em de Qırım işğaline qarşı çıqqan cemaat teşkilâtlarınıñ faaliyetine keder etüv kibi insan aqlarınıñ bozulması boyunca eki cinaiy taqiqatqa başladı.
